Reperi Arkimed Lushaj, i njohur me emrin e artit Stresi, pas vdekjes së mikut të tij Brilant Martinajt ka marrë vendimin e rëndësishëm ku ka vendosur që të anulojë të gjitha koncertet dhe performancat e tij gjatë kësaj periudhe.
Lajmin e ka bërë të ditur vetë reperi përmes një postimi në rrjetin e tij social Instagram, ku shkruan se arsyeja e këtij vendimi është se ka nevojë për qetësi.
“I kërkoj ndjesë publikut. I kërkoj ndjesë të gjitha klubeve ku do performoja, por anuloj çdo aktivitet timin, kam nevojë për qetësi”.
Për shkak të vrasjes së mikut të tij, Brilant Martinaj një ditë më parë në një atentat mafioz, këngëtari ka kërkuar mirëkuptimin e fansave, por edhe lokaleve ku do të performonte.
Në videon e publikuar, reperi dëgjohet teksa ka thënë në një nga permormancat e tij: “Një përshëndetje speciale shkon për Brilant Martinaj”.
Kujtojmë se, 22-vjeçari u ekzekutua në një atentat mesditën e së dielës (17 korrik) së bashku me miqtë e tij Besmir Hoxha dhe Diklen Vata. Ndaj makinës me të cilën lëviznin tre të rinjtë u qellua me breshëri kallashnikovi rreth 90 herë, duke bërë që mjeti të shpërthente në flakë.
Brenda mjetit u dogjën Martinaj dhe Hoxha, ndërkohë që Vata mundi të dalë nga makina, por që nuk u la i gjallë nga atentatorët të cilët u kthyen dhe e ekzekutuan.
