Prej disa ditësh një vajzë 17-vjeçare nga Durrësi troket dyerve të pavionit të Toksikologjisë në QSUT për tu shtruar, por nuk e pranojnë. Psikologia Eglantina Nikollaj që ka ndjekur rastin thotë se prindërit e vajzës i janë ankuar për mungesë vëmendje nga strukturat shëndetësore.
“Ka disa ditë që vajza kërkon të shtrohet në pavion por njëherë i thonë s’ka vende sepse në pavion ka vetëm meshkuj, e njëherë tjetër se po dezinfektohet për shkak të covid. Vajza vijon të bëjë jetën e rrugës duke u droguar dhe po rrezikon jetën”, thotë psikologia Nikollaj.
I kontaktuar nga gazeta “Si” shefi i pavionit të Toksikoligjisë në QSUT, Andrin Tahiri thotë se e njeh rastin në fjalë, por pacientja minorene ka probleme të theksuara psikike.
“E njoh rastin, por vajza ka qenë e shtruar në pavionin e Psikiatrisë Infantile ku ka marrë mjekim si dhe është pastruar nga drogërat që ka përdorur. Para daljes nga spitali, nga një vlerësim i përgjithshëm vajza ka rezultuar e pastër”, thotë doktor Andrini.
Overdozat, prioritet për shtrimet
Për shefin e pavionit të Toksikologjisë në QSUT, në këto ditë të nxehta vere, prioritet për shtrime janë overdozat, që po ndeshen rëndom tek moshat e reja. Sipas tij, situata e covid-19 ka reduktuar ndjeshëm nga 20, në 12 shtretërit pas tamponeve pozitivë që u konstatuan këtë javë.
“Jam i detyruar të jem selektiv në shtrime sepse zbatojmë protokollet e Covid. Në pavion kanë mbetur vetëm 5 pacientë, një prej të cilëve dy ditë më parë kreu vetëvrasje duke kaluar në overdozë pas konsumimit të medikamenteve të psikiatrisë dhe drogës, dy të tjerë të pickuar nga “merimanga e zezë” dhe dy të tjerë të helmuar nga ushqimet”, thotë për gazetën “Si”, shefi i pavionit të Toksikologjisë Andrin Tahiri.
Përdoruesit e drogave, pacientë kronikë që nuk rehabilitohen
Nevoja për detoksifikim në pavionin e Toksikologjisë në QSUT është e madhe. Doktor Andrini thotë se kërkesat janë të larta nga të gjitha rrethet. Sipas tij, përdoruesit e drogave që paraqiten në spital janë pacientë kronikë me historik më shumë se 5 vjet në përdorimin e drogave.
Por rreziku qëndron pas daljes nga spitali ku ata i drejtohen sërish rrugës për tu droguar.
“Në spital marrin të gjithë trajtimin e nevojshëm por sapo kthehen në shtëpi vijojnë të njëjtèn gjë. Problem mbetet rehabilitimi që tek ne mungon. Nuk ka një qendër rehabilitimi ku pacientët kronikë përdorues të drogave të integrohen, të marrin një zanat me qëllim largimin nga droga. Përveç kësaj, në Shqipëri nuk funksionojnë në grup shërbimet e tjera sociale me qëllim që pacienti të ketë mundësi rehabilitimi sa më parë”, thotë shefi i pavionit të Toksilologjisë Andrin Tahiri.
Sipas tij, edhe rasti i vajzës nga Durrësi është një prej tyre ku asnjë nga strukturat, madje as policia nuk ndërhyn për të ndihmuar familjarët e vajzës ta kthejnë atë nga rruga në shtëpi. Deri në zgjidhjen e kësaj situate të pashpresë, prindërit e 17-vjeçares po luten dyerve të spitaleve që ta shtrojnë vajzën e tyre, sepse ata nuk janë në gjendje ta mbrojnë atë nga rruga./ Marrë nga GazetaSi
