Qeveria shqiptare duket se është e vendosur që t’i shkojë deri në fund propozimit për hartën e re gjyqësore. Ministri i Drejtësisë, Ulsi Manja, tha dje se qëndrimet e institucionit që drejton do t’i bëjë të ditura sot në mbledhjen e Komisionit të Ligjeve, ku është i thirrur për dëgjesë publike.
Në një dalje për mediat, ministri i Drejtësisë u shpreh se gjatë seancës dëgjimore të thirrur nga deputetët pas grevës së avokatëve, do të jepen përgjigjet e duhura për hartë. Por, Manja u shpreh edhe njëherë se janë në pritje të opinionit të Ministrisë së Financave në lidhje me kostot e hartës dhe vetëm pas kësaj ajo do të shkojë direkt në qeveri për miratim.
I pyetur nga gazetarët nëse do të ndryshojë qasja e dikasterit që drejton apo ndonjë reflektim pas protestës së avokatëve, Manja u shpreh se nesër do jetë në Komision në orën 14:00 për të dhënë shpjegimet e duhura.
Harta e re gjyqësore kundërshtohet nga avokatët, të cilët janë në protestë dhe kanë bojkotuar seancat për masat e sigurisë deri më 27 korrik. Më herët, në lidhje me bojkotin e avokatëve ka pasur një reagim të vetë kryeministrit Edi Rama që u shpreh se harta gjyqësore nuk ka për të ndryshuar, duke thënë se bojkoti është i pavlerë.
