Në mbledhjen e Komisionit të Ligjeve ku po diskutohet për rezolutën e Projekt- Rezolutën e vlerësimit të veprimtarisë së Këshillit të Lartë të Prokurorisë gjatë vitit 2021, deputeti Gazment Bardhi bëri një sugjerim.
Bardhi kërkoi një shtim në rezolutë ku të jenë rekomandimet që nuk janë përmbushur. Sipas deputetit të PD-së, rezoluta është shumë rrëmujë.
“Rezoluta e KLP duhet të jetë e veçantë. Duhet të ketë një pjesë të posaçme me rekomandimet që nuk janë përmbushur. Propozoj që ne duhet t’i japim rëndësi atyre që propozuan kolegët. Është shumë rrëmujë rezoluta. Duhet të ketë një pjesë të posaçme për rekomandimet e papërmbushur”, tha Bardhi.
Kryetarja e Komisionit, Klotilda Bushka u shpreh se ka një mospërmbushje të rekomandimeve që nuk kanë justifikim pasi është detyrim ndaj ligjit që të zbatohen të gjitha rekomandimet e Kuvendit.
“Rezoluta ka një format. Jepet çfarë vlerësohet e se çfarë rekomandohet. Te pjesa e konstatimeve jepet kjo çështje, një pjesë e mospërmbushjeve janë të justifikuara një pjesë tjetër jo. Është detyrim i ligjit që të realizohen detyrimet ndaj Kuvendit. Unë mendoj se kjo do të rrijë si strukturë por do të jetë më e plotë për të dalë në pah ajo që thoni ju. Jeni dakord me këtë rezolutë? Të gjithë pro”, u shpreh Bushka.
