Është arrestuar një nga autorët për plagosjen me armë zjarri të pronarit në Volorekë Johan Muçllarin. Bëhet fjalë për personin e identifikuar me emrin Griseld Maxhari, ndërsa autori tjetër, Firdeus Berberi është ende në kërkim
Maxhari pritet të përballet me akuzën për veprën penale “Vrasja me dashje” kryer në bashkëpunim, mbetur në tentativë; “Mbajtja pa leje dhe prodhimi i armëve, armëve shpërthyese dhe i municionit”; “Prishja e qetësisë publike”.
Johan Muçllari është djali i Jetmir Muçllarit, pronarit të hotel Volorekës, ku ka një histori konflikti disa vjeçar me grupin e të fortit të Pogradecit, Ilir Berberi. Ky është atentati i tretë ndaj Johan Muçllarit. Në orën 16:00 të pasdites, 22-vjeçari Johan Muçllari ka shkuar vetë në spitalin e qytetit i plagosur në këmbë dhe ka kërkuar ndihmë mjekësore. 22-vjeçari është jashtë rrezikut për jetën, duke i shpëtuar sërish një atentati të tretë. Kanë qenë bluzat e bardha që kanë sinjalizuar uniformat blu pas mbërritjes së tij në spital.
Kush është Ilir Berberi, babai Firdeus Berberit, i shpallur dje në kërkim
Ilir Berberi është një person me rrezikshmëri të lartë shoqërore dhe një emër i njohur për policinë, ku ka qenë i hetuar dhe dënuar për vepra të ndryshme kriminale. Ilir Berberi ka qenë i dënuar për gjobëvënie, vjedhje dhe armëmbajtje pa leje. Në Pogradec njihet si “Liri i Rrushkës”, ndërsa është hetuar edhe për disa ngjarje të rënda kriminale si për vrasjen e shefit të komisariatit në Pogradec Agron Gjyrezi. Ndaj Berberit, Gjykata e Rrethit Gjyqësor Pogradec ka vendosur masën e sigurisë “Arrest në burg”, për disa vepra të rënda penale kanosje kundërshtim i punonjësve të Policisë etj.
