Aktivistja Evi Kokalari shkruan se avokates së saj Endira Bushatit i kanë sulmuar llogarinë në FB pasi postoi një opinion për padinë e Belind Këlliçit.
“Avokatja ime Endira Bushati, dje postoj një opinion të sajin për padinë ordinere te Belind Këlliçit ndaj meje. Sot filluan sulmet dhe ndaj saj – duke sulmuar llogarinë në FB nga ku dhe komentoj për këtë çështje”, shkruan demokratja.
Kokalari ka nisur denoncimet për manipulimin e votave që sipas saj ka bërë Belind Këlliçi, ku ka postuar foto me numra dhe shkruan se janë numrat respektivë të përdorur në listën e votimit për kandidatët e Këshillit Kombëtar të PD-së më 30 prill. Sipas saj, me anë të kësaj liste Këlliçi ka lobuar dhe orientuar votuesit për kandidatët që janë zgjedhur. Kokalari thotë se nga 67 personat në listë që ka publikuar, 43 prej tyre janë zgjedhur dhe përbëjnë 15% të Këshillit. Sipas Kokalarit, Këlliçi ka fuqizuar kështu klanin e tij dhe kanë lënë jashtë liste të rinjtë e tjerë që kandiduan.
Kokalari akuzoi Këlliçin se kishte lobuar dhe orientuar votat për të siguruar një vend në Kryesi. Kjo përplasje nisi para se PD e Berishës të finalizonte zgjedhjen e organeve drejtuese, përmes posteve më të rëndësishme në parti pas kryetarit, Sekretarit të Përgjithshëm dhe nënkryetarëve, por që Këllici nuk mori asnjë post.
