Nisja e gjykimit për ish-kryetarin e Gjykatës Kushtetuese, Bashkim Dedja ka dështuar sërish, kjo për shkak të mungesës së prokurores Doloreza Musabelli.
Bashkim Dedja akuzohet nga Prokuroria e Posaçme kundër Korrupsionit dhe Krimit të Organizuar për fshehje të pasurisë pasi dyshohet se ka blerë një apartament në Golem të Kavajës me burime të paligjshme.
Apartamenti ishte regjistruar në emër të vëllait të Dedjes. Seanca e radhës u caktua më 4 korrik.
Kujtojmë që ish-kreut të Kushtetueses i është sekuestruar apartamenti me urdhër të SPAK. Hetimi për gjyqtarin e larguar nga sistemi i drejtësisë kishte nisur që në maj të 2020-s për akuzën e refuzimit dhe fshehje së pasurisë.
Bashkim Dedja u emërua anëtar i Gjykatës Kushtetuese në vitin 2010, ndërsa në 2013 u emërua kryetar i kësaj gjykate, detyrë të cilën e ka mbajtur deri në 2018, kur u shkarkua me vendimin të Kolegjit të Posaçëm të Apelimit (KPA).
