Ndërtesa e Kuvendit në Kosovë u sulmua mbrëmjen e ditës së djeshme me predha antitank. Pas sulmit me mjete shpërthyese gjendja është normalizuar dhe autoritetet kanë lejuar lëvizjen e qytetarëve në rrugën në të cilën gjendet Kuvendi i Kosovës, shkruajnë mediat kosovare .
Veç dëmeve materiale, fatmirësisht, nuk ka të lënduar në njerëz. Në vendgjarje janë të pranishme forca të Policisë së Kosovës dhe gjithashtu KFOR0it, ndërsa kanë nisur hetimet për zbardhjen e ngjarjes dhe zbulimin e autorëve. Autoritetet e Kosovës raportojnë se në një zonë tjetër të kryeqytetit është gjendur një motoçikletë e djegur dhe dyshohet se ajo është përdorur nga agresorët për t’u larguar nga vendi i sulmit.
Policia dyshon se bëhet fjalë për dy persona që sulmuan Kuvendin me predha antitank. Prani policore ka në të gjitha rugët e Prishtinës dhe janë kryer shumë kontrolle automjetesh dhe qytetarësh. Ende nuk dihen se cilat janë motivet e sulmit ndaj ndërtesës së Kuvendit. Sulmi u dënua ashpër nga polika në Kosovë dhe AAK-ja ishte subjekti që reagoi më shpejt, duke e cilësuar agresonin si “akt kriminal dhe sulm ndaj shtetit dhe demokracisë”.
Në të njëjtin kuadër reagoi kryeministri i Kosovës, Isa Mustafa, i cili tha se sulmi ishte një agresion i qartë ndaj pavarësisë së vendit. Edhe presidenti Hashim Thaçi dënoi sulmin duke thënë se ata që e kanë kryer nuk duan të mirën e Kosovës.
