Partia Socialiste ka hedhur sërish poshtë kërkesën e grupit parlamentar të PD, për Komision Hetimor për Investimet Strategjike. Burime brenda Konferencës së Kryetarëve, kanë bërë me dije se është votuar kundër kërkesës së Grupit Parlamentar të PD të udhëhequr nga Enkelejd Alibeaj për ngritjen e një Komisioni Hetimor për Investimet Strategjike.
Kujtojmë se grupi parlamentar i Partisë Demokratike depozitoi një kërkesë për ngritjen e një komisioni hetimor për investimet strategjike në vend. Por nisma mbeti në mes për shkak se për të ngritur një komision hetimor duhen 35 firma dhe grupi i PD-së, megjithëse e kishte protokolluar kërkesën me numrin e duhur të firmave, Agron Duka u tërhoq, duke e lënë dokumentin me 34 firma. Por më pas u shtuan edhe firmat e Enkelejd Alibeajt dhe Lulzim Bashës.
Kjo çështje u kthye edhe në temë diskutimi brenda opozitës për shkak se deputeti Gazment Bardhi akuzoi Sali Berishën se ka bashkuar votat me Ramën për të bllokuar ngritjen e këtij Komisioni. Sipas grupit të Alibeajt asnjë nga deputetët që ndjekin linjën e Berishës nuk ka firmosur për ngritjen e këtij Komisioni, me përjashtim të deputetit Bujar Leskaj që kishte firmosur edhe më parë.
