Dalin pamje nga operacioni i dy ditëve më parë ku në qarkun e Shkodrës, përkatësisht në Velipojë u asgjësuan tre parcela me kanabis të cilët ishin në fazën e korrjes. Policia aty mundi të indentifikonte një infrastrukturë të tërë e cila ishte e lidhur me çadrat e kampingut deri te rrjeti i vaditjes së drogës.
Pas zbulimit të tre parcelave policia arrestoi dhe katër efektivë të Velipojës, mes tyre dhe nën komisar Zamir Sytari, 40 vjeç, Shef i Stacionit të Policisë Velipojë; N/Komisar Arben Hoxha, 45 vjeç, Inspektor Ergys Lohja, 34 vjeç, inspektor Hysni Beqirin, 53 vjeç me detyrë Ndihmës Specialist i Policimit në Komunitet, në Stacionin e Policisë Velipojë.
Për të katërt efektivët Gjykata vendosi masën e sigurisë arrest me burg.
Këto parcela sipas hetimeve të drejtorisë së narkotrafikut në policinë e shtetit dhe agjencinë e mbikëqyrjes policore ishin aktive prej më shumë se 3 muaj dhe njëra prej tyre ishte mbjellur për herë të dytë pas korrjes së kanabisit.
Ndërsa në këtë foto shihet edhe infrastruktura e tharjes së bimës narkotike si dhe sasia prej afro 150 kg e cila ishte duke u bërë gati për paketim dhe tregtim.
