Arben Bekteshi, 30-vjeçari që i shpëtoi sot një atentati në Elbasan është vëllai i Enea Bekteshit, të riut që është pas hekurave për përplasjen me efektivët e policisë, ngjarje e ndodhur në të njëjtin qytet më 18 shtator të vitit 2017.
Mbrëmjen 18 shtatorit, Enea Bekteshi ishte së bashku me Kelmend Xhaferrin dhe Suel Çelën në mjetin e llojit “Audi” të blinduar kur dhe ndodhi përplasja me efektivët. Pas muajsh hetime, Bekteshi vendosi që të pranonte autorësinë e përplasjes me mjetin e policisë, por deklaroi se ishte nën efektin e lëndëve narkotike dhe se nuk kishte kuptuar asgjë.
“Nuk isha me shpejtësi, doja të futesha te tregu, por makina “Golf” bëri mbrapa dhe prandaj ndodhi edhe aksidenti. Nuk e pashë që makinat përballë tregut ishin të policisë. Nuk kishin asnjë shenjë dalluese policie. Edhe policët ishin të veshur civilë, ndërkohë që nuk më është bërë shenjë për të ndaluar. Jam larguar me shpejtësi menjëherë sapo dëgjova të shtënat. Kam parë plumbat në xhama dhe u tremba, prandaj ika. Nëse makina nuk do ishte e blinduar, mbase nuk do isha këtu, si pasojë e të shtënave që u bënë në drejtim të mjetit që unë drejtoja,”- shprehej Bekteshi në gjyq.
Çfarë ndodhi sot?
Arben Bekteshi është qëlluar me armë zjarri shtatë herë nga Ermal Mitishi, por asnjë plumb nuk e ka kapur. Sherri mes dyshes ka nisur tre javë më parë për një parakalim makine. Gjatë kësaj kohe Mitishi kishte përgatitur planin për të sulmuar Bekteshin me armë në lagjen e tij.
