Në javët e fundit, por sidomos ditën e sotme, kryeministri Edi Rama iu ka tërhequr vëmendje kryebashkiakëve dhe jo vetëm për nivelin e ulët të të ardhurave që kanë mbledhur. Nisur nga këto kritika Drejtori Tatimore ka nisur sot aksioni me “dorë të hekurt” te bizneset që nuk paguajnë detyrimet. Administrata Tatimore sqaron se gjithsej janë kryer mbi 60 kontrolle verifikimi, nga të cilët 25 individë, ushtronin aktivitet të paregjistruar në organet tatimore, 12 subjekte, që edhe pse ishin në listën e denoncuar nga Bashkia Kamëz për parregullsi, nga verifikimet rezultoi se ishin të regjistruara me NIPT dhe 2 subjekte që ishin me aktivitet të pezulluar, u riaktivizuan nga Administrata Tatimore konform legjislacionit në fuqi.
“Mbi 60 kontrolle janë kryer në bizneset e Kamzës, duke rezultuar në mbylljen e 25 subjekteve që ushtronin aktivitet të paregjistruar. Administrata Tatimore njofton se ka nisur sot nga Kamza një aksion për identifikimin e paligjshmërive në terren, që pritet të vijojë në të gjithë vendin për goditjen e informalitetit”, thuhet në njoftim. Ndërsa bëhet me dije se kontrollet do të vazhdojnë.
