Pa rivalë në garë, Hervin Fora “gllabëron” tenderin 350 mln lekë të Burgjeve

Nje tjetër tender i dyshimtë është organizuar nga Drejtoria e Përgjithshme e Burgjeve. Pas tenderave për ushqimin e të burgosurve institucioni i Burgjeve ka filluar të ndërhyjë edhe në tenderat që kanë të bëjnë me shëndetësinë. I tillë është edhe tenderi që do t’ju paraqesim sot ku Drejtoria e Përgjithshme e Burgjeve i ka “falur” gati 350 milionë lekë të vjetra me TVSH kompanisë EUROMED në pronësi të Hervin Forës. Ky i fundit është lakuar shumë herë për tenderat e dyshimtë që ka fituar në shëndetësi nga ministrja e Shëndetësisë, Ogerta Manastirliu. E në fakt duket se tashmë ka filluar të vjelë para edhe nga burgjet.
Më konkretisht bëhet fjalë për tenderin me numër reference REF-30224-05-20-2022 dhe me objekt “Blerje materiale mjekësore dhe stomatologjike” organizuar nga Drejtoria e Përgjithshme e Burgjeve. Duke parë dokumentacionin e tenderit shikohet se bëhët fjalë kryesisht për materiale mjekësore të konsumueshme dhe materiale mjekësore konsumi jo-kimike dhe hematologjike.
Fondi limit i këtij tenderi rezulton të jetë 30,643,562 lekë të reja pa TVSH ose rreth 360 milionë lekë të vjetra përfshirë TVSH. Shikohet se bëhet fjalë për një mungesë të konkurrencës pasi nga dokumentacioni rezulton se ka marrë pjesë në garë vetëm një firmë, pikërisht EUROMED e Hervin Forës që u shpall edhe fitues. Ndërkaq vlera fituese rezulton të jetë sa 94% e fondit limit të tenderit.