Kreu i Dhomës së Avokatisë së Shqipërisë, Maks Haxhia në një intervistë për Report Tv, ka bërë me dije se bojkoti po funksionon në të gjitha gjykatat në rang vendi. Ai tha se me zvogëlimin e numrit të gjykatave do të rritet vetëgjyqësia.
“Të gjithë anëtarët e dhomës të Avokatisë janë këtu, ne ishim të bindur për këtë, po thjesht bëmë një inspektim dhe nuk ka asnjë avokat në Gjykatat. Mund të rritet vetëgjyqësia me eleminimin e gjykatave. Çështjet që janë me afat dhe masat e sigurie nuk do jenë objekt i bojkotit”, tha Haxhia.
Një përgjigje ka pasur edhe për ministrin e Drejtësisë, Ulsi Manja i cili tha se janë reflektuar kërkesat e avokatëve.
“Manja nuk ka qenë pjesë e vendimmarrjes është në fazën e dytë ku do ia përcjellë qeverisë dhe duke analizuar se kryesorja është e faturës financiare se këtu ka përgjegjësi qeveria dhe ne nuk jemi kundër qeverisë, por kundër vendimit që ka marrë KLGJ, qëllimi i dytë është që t’i transmetohet Manjas ato problematika nga pikëpamja juridike dhe sociale, është bërë vetëm , që Gjykata e Sarandës do të jetë përsëri në Sarandë nuk do jetë e aplikueshme në Gjykatën e shkallës së parë në Gjirokastër”, u shpreh Haxhia.
Haxhia ka bërë me dije se duhen të paktën 3 Gjykata të Apelit, teksa ka bindjen se qeveria do të reflektojë, ndërsa shton se deri më tani nuk është menduar për të shkuar deri në Gjykatën Kushtetuese.
