Ambasadori amerikan në Beograd, Christofer Hill është shprehur se Serbia që duhet të përcaktojë se ku është e ardhmja e saj. Në një bashkëbisedim me gazetarët, Hill foli për qëndrimin neutral të Serbisë për agresionin rus në Ukrainë, duke e cilësuar si të papranueshëm.
“Ne nuk kemi parë një zhvillim të tillë që nga Lufta e Dytë Botërore. Pra, të gjithë jemi të vetëdijshëm se bota ka ndryshuar që nga 24 shkurti dhe se të gjithë duhet të mendojmë se ku jemi, cili është pozicioni ynë dhe ku duam të jemi në të ardhmen”, deklaroi Hill.
Diplomati amerikan komentoi dhe “ultimatumin” e kancelarit gjerman Olaf Scholz ndaj Serbisë për njohjen e Kosovës. “Unë nuk do të ndalem aq shumë në fjalë individuale dhe interpretimin. Ajo që është e rëndësishme është që Serbia dhe Kosova të punojnë për zgjidhjen e problemeve të ndërsjella dhe vendosjen e disa marrëdhënieve në fund të dialogut të Brukselit”, tha ambasadori amerikan.
