“Albcontrol”, shoqëria shtetërore që menaxhon hapësirën ajrore shqiptare qarkullon miliona euro në tendera për punonjësit dhe drejtuesit ekzekutiv të saj. Përveçse punonjësit paguhen me paga të larta, në tenderat që “Albcontrol” merr, përfshihen dhe benefite të tjera. Paga për orë shtesë, palestër, qindra mijë euro për pastrimin e ambienteve si dhe pushime me paratë e firmës shtetërore. Së fundmi, në një shkresë të siguruar nga Gijotina.com, zbulohet sesi shoqëria që menaxhon hapësirën ajrore ka marrë një tender edhe për kurse anglishteje. Ndërkohë që një nga kriteret e punësimit të kontrollorëve duhet të jetë gjuha angleze, “AlbControl” me këtë tender zbulon punësimet me ndërhyrje dhe pa merita në institucionin që menaxhon shoqërinë ajrore shqiptare.
Sipas dokumenteve që disponon Gijotina.com, “Albcontrol” ka hapur tenderin me procedurën e hapur, ndërmjet kufirit të ulët dhe të lartë monetar. Bëhet fjalë për procedurën me REF-32381-06-09-2022 dhe me objekt “trajnim /testim anglisht ATSEP /AIS”. Fondi limit i këtij tenderi është 16,666,666 lekë pa TVSH, ose me TVSH shuma shkon në rreth 160 mijë euro.
Një shumë e konsiderueshme, pasi nisur edhe nga objekti bëhet fjalë për trajnim apo për t’u mësuar anglishten këtyre punonjësve. Në dokumente thuhet se kohëzgjatja e kontratës/marrëveshjes kuadër ose afati për zbatimin e saj është 9 muaj. Tenderi do të bëhet në datën 27 qershor 2022, ndërsa do të implementohet në muajt në vijim.
Në dokumentet shoqëruese, të siguruara nga Gijotina.com, thuhet se “ALBCONTROL SH.A. kërkon kryerjen e kursit të gjuhës angleze të aviacionit për personelin ATSEP (Inxhiniero-teknik) në përputhje me standartet e vendosura nga ICAO dhe kërkesat lokale të përputhshmërisë”.
Sipas saj, gjithashtu ALBCONTROL SH.A. kërkon kryerjen e kursit të gjuhës angleze të aviacionit për personelin Specialist të AIS-it në përputhje me standartet e vendosura nga ICAO. “Pjesëmarrësit në këtë kurs janë personel i ALBCONTROL SH.A. (ATSEP dhe specialistë të AIS-it). Numri i pjesëmarrësve ATSEP: 25 (njёzet e pesë) ATSEP. Numri i pjesëmarrësve specialist të AIS: 19 (nëntё-mbё-dhjetё) specialistë”, thuhet në këto dokumente.
Sipas dokumenteve, kursi do të jetë 5 (pesë) ditë pune dhe test, e njëjtë për të gjithë kandidatët. “Kursi do të zhvillohet nё 2 grupe, me nga 12 dhe 13 ATSEP për grup, kurse Specialistët e AIS nё 2 grupe me nga 6 në grup dhe një grup me 7. Periudha e përshtatshme për zhvillimin e kursit është qershor – shtator 2022. Orari i përshtatshëm për zhvillimin e kursit është 09:00 AM – 17:00 PM“, thuhet në këto dokumente.
