Zëvendëskryeministri Arben Ahmetaj ka dalë në një deklaratë për media pas mbledhjes së Këshillit të Ministrave për të bërë publike vendimet e marra.
Ahmetaj është vënë në siklet kur njëra nga gazetarët e pyeti se me çfarë kishte ardhur në punë sot, kur çmimi i naftës ka arritur në 258 lekë për litër, shifra më e lartë që kur është ngritur Bordi i Transparencës.
Gazetarja: E kam lënë makinën dhe jam detyruar që të lëviz me autobus, ndërkohë që dhe këta të fundit i ka kapur kriza e naftës, dhe nuk ndezin kondicionerët. Ju me çfarë keni ardhur në punë sot? A keni shmangur lëvizjet me makinë?
Ahmetaj: Unë dua të ndaj me ju që qeveria ka menduar para disa muajsh për qytetarët, me ato paketa publike që janë në funksion, Shqipëria e ka inflacionin më të ulët se i gjithë rajoni, kjo ka të bëjë me mbështetjen që qeveria i ka dhënë qytetarëve. Ju ftoj që ta shikoni të shikoni statistikën e rajonit. Është një krizë globale fatkeqësisht, që e ka gjenezën në Ukrainë, siç e shihni globalisht diskutimi është për sigurimin e rrugëve të furnizimit. Po në këtë fazë ku gjithë kriza e preson tregun, ne do të vuajmë dhe pasojat e asaj krize, që nuk i dihet fundi. Qeveria mbi të gjitha është përgatitur që hap pas hapi të marrë masat e duhura.
