Tre shtetas britanikë, mes tyre dhe një ish kampion britanik i xhudos janë dënuar nga gjykata për trafik të paligjshëm të emigrantëve shqiptarë në Britani me barkë përmes brigjeve të kanalit anglez, Kent.
Robert Stilwell, 33, nga Dartford, është dënuar me 4 vjet pasi u akuzua fajtor për tentativën e trafikut drejt Britanisë të 18 shqiptarëve përmes një varke, duke rrezikur mbytjen e tyre. Mbrëmjen e 28 majit, 15 burra, një grua dhe dy fëmijë shqiptarë u shpëtuan nga rojet bregdetare pas telefonatës së familjarëve të tyre se rrezikonin të mbyteshin pasi varka ku ata po lundronin ishte duke u fundosur.
Robert Stilwell , 33 vjeç dhe bashkëpunëtori i tij, Mark Stribling, 35 vjeç pranuan akuzat dhe të dy janë dënuar nga gjykata e Maidstone. Ndërkohë një tjetër anglez Stephen Jackson u dënua nga gjykata e Lewes pasi tentoi të fuste në Angli një grup shqiptarësh 6 ditë përpara ngjarjes në brigjet e kanalit anglez, Kent.
Jackson, 51 vjeç u dënua me 4 vjet e 9 muaj burg për ngjarjen e 23 majit kur përmes një varke tentoi të fuste në Angli një grup tjetër shqiptarësh.
Lajmi u publikua në mediat britanike.
