Pas dështimit të tre raundeve dhe mosmarrëveshjeve të opozitës me maxhorancën për zgjedhjen e presidentit, vjen dhe reagimi i deputetit socialist, Erion Braçe. Përmes një postimi në Facebook, Braçe shkruan se duhet një president që ta pranojë e gjithë Shqipëria.
Ndërsa komenton tërheqjen e opozitës për të dhënë një kandidat për kreun e Shtetit, Braçe shkruan se “topi” i kalon në fushë maxhorancës dhe se opozita i dha fund përgjegjësisë së saj.
“Na duhet një president që ta pranojë Shqipëria, ta pranojë PD e Berishës, e Alibeajt, e Bashës, e Fatmir Mediut. Opozita i dha fund sot përgjegjësisë së saj, tre raunde ishin të sajat për të zgjedhur presidentin sa kohë duheshin më shumë vota, 84. Ne nuk i kishim. Tani përgjegjësia është e gjitha tek ne, sa kohë është tek ne duhet të bëjmë të gjithë përpjekjen të zgjedhim presidentin që do Shqipëria, që e pranon shoqëria dhe natyrisht do të jetë thelbi i unitetit të kombit”, thekson Braçe.
