Sonte në orën 21:00 luhet finalja e madhe e Conference League. Ndërkaq, përplasje të tjera pritet të ndodhin teksa tifozët e Romës po vjedhin thika nëpër restorantet në Shqipëri për t’u përleshur me grupet e tifozëve të Feyenoord. Të paktën kështu shkruajnë mediat italiane.
Më shumë se 70 mijë tifozë pritet të vijnë nga aeroporti i Rinasit dhe Porti i Durrësit, në rrugë detare dhe tokësore. Mësohet se po vijnë tifozë holandezë edhe nga pika e Hanit të Hotit e Muriqanit për të parë ndeshjen në kryeqytet.Mijëra tifozë nga Italia dhe Holanda tashmë kanë mbushur rrugët e qytetit dhe e gjithë paraditja e sotme ka qenë një festë me muzike e pije.
800 të ftuar VIP të UEFA-s, rreth orës 20:00 do të hyjnë nga pjesa ballore e stadiumit “Air Albania”, ku gjithçka është gati për t’i mirëpritur, për të ndjekur ndeshjen finale të UEFA Conference League. Në këtë listë janë drejtues të 55 vendeve të futbollit, janë personalitete të ndryshme.
Edhe Kryeministri Rama do të jetë në stadium. Sipas Federatës Shqiptare të Futbollit janë akredituar më shumë se 300 gazetarë që do të komentojnë këtë finale, duke i bërë kështu një promovim të jashtëzakonshëm vendit tonë.
