Presidenti Ilir Meta ka folur pas konferencës që u mbajt në Tiranë, kundër trafikimit të qenieve njerëzore, ku ishte e pranishme dhe ambasadorja Kim, me të cilën kreu i shtetit shtrëngoi duart, pas një periudhe të gjatë mosmarrëveshjes mes tyre.
Meta nuk preferoi që ti jepte përgjigje pyetjes se cili prej tyre shtriu dorën i pari, ndërkohë që tha se lufta kundër trafikimit të qenieve njerëzore, e veçanërisht fëmijëve, duhet të jetë një prioritet i qeverisë dhe opozitës.
“Asnjë problem në këtë drejtim, përveç forcimit të mëtejshëm të bashkëpunimit, jo vetëm kundër trafikimit të qenieve njerëzore, edhe për shkak të largimit jashtë vendit edhe të fëmijëve të pashoqëruar nga prindërit, të cilët bien shpesh pre e trafikantëve ndërkombëtarë. Një pasojë e madhe për shkatërrimin e familjes, dhe shteron energjinë e vendit, lufta kundër trafikut duhet të jetë një prioritet, qoftë për qeverinë, qoftë për opozitën dhe parlamentin. Trafikimi është një krim ndërkombëtar, dhe nuk mund të ballafaqohet veçse me bashkëpunim mes shteteve dhe organizatave ndërkombëtare”, u shpreh presidenti.
