Deputeti demokrat Oerd Bylykbashi ka dalë në një deklaratë për mediat, një orë para mbledhje së thirrur nga Enkelejd Alibeaj me grupin e deputetëve ku pritet të diskutohet çështja e Presidentit të ri.
Nga selia blu, Bylykbashi e quajti marrëveshjen mes Alibeajt dhe mazhorancës për zgjedhjen e presidentit, si favor për Ramën. Sipas Bylykbashit, me anë të asaj marrëveshje, Rama kërkon që të zgjedhë kandidatin e preferuar të cilin do ia sigurojë Alibeaj me 84 vota.
“Dje më 18 maj 2022 pesë vite më pas u shpall një marrëveshje e re. Balla i dha të drejtën deputetit Alibeaj të propozojë kandidat ne raundin e dyte dhe te trete. Me këtë akt Rama kërkon që kandidatin e tij të preferuar ta sjellë opozita e caktuar prej tij e ajo të sigurojë 84 votat për ta shitur si president konsensual. Me marrëveshjen e djeshme Alibeaj ka marrë përsipër t’ia sigurojë këtë”, tha Bylykbashi.
Ditën e sotme në orën 12:00, në selinë e Partisë Demokratike, Enkelejd Alibeaj ka kërkuar një mbledhje të grupit parlamentar për të diskutuar lidhur me propozimet e opozitës për presidentin e ri të vendit duke ndërmarrë hapa konkretë për të nisur nga puna me marrëveshjen me Ballën.
