Rreth 20 punonjës të inceneratorit të Fierit janë ngritur në protestë pasi prej 4 muajsh nuk kanë marrë pagat. Punëtorët kanë bllokuar hyrjen e inceneratorit dhe nuk lejojnë kalimin e automjeteve të rënda të mbushura me mbetje urbane.
Pas hetimeve që SPAK ka nisur, inceneratori është sekuestruar dhe është vendosur nën administrimin e Zyrës për Menaxhimin e Pronave të Sekuestruara.
Të arrestuar dhe në hetim për impiantin e mbetjeve në Fier janë ish-ministri i mjedisit, Lefter Koka, ish-deputeti solcialist, Alqi Bllako dhe ish-kryetari i Komisionit të Shpronësimit, Pëllumb Abeshi. Ish zyrtarët dyshohet se kanë favorizuar biznesmenin Klodian Zoto për ndërtimin e inceneratorët në këmbim të shumave të mëdha parash.
Referuar hetimit, ata i kanë paraqitur dokumente të falsifikuara qeverisë për shpronësimin e truallit nga “tokë arë” në “tokë truall” në vendin ku u ndërtua inceneratori duke shkaktuar një dëm afro 16 milionë lekësh të cilët ish deputeti i merrte në sajë të punësimit fiktiv që i kishte bërë babit të tij.
Kjo nuk është hera e parë që punonjësit e këtij inceneratori protestojnë për pagat. Më 30 prill, rreth 30 punonjës protestuan për të njëjtën kauzë.
