Shkodra tronditet nga sulmet e armatosura ku shënjestra e radhës ka qënë Dedë Pllanaj, kushuriri i të ndjerit Bardhok Pllanajt, i ekzekutuar para disa muajsh. Djali i xhaxhait të Bardhok Pllanajt, Dedë Pllanaj ka mbetur i plagosur dhe është jashtë rrezikut për jetën. Ai ka marrë plagë në këmbë dhe në krah ndërsa të shtënat kanë ndodhur në zonën e Dobraçit. Bardhok Pllanajt, i njohur si ‘kumbari i drogës’ në Shkodër, u ekzekutua me 4 prill të vitit të kaluar.
Por kush ishte Bardhok Pllanaj?
Vrasja e Bardhok Pllanajt në Shkodër cilësohet nga ekspertët e hetimit si një shfryrje dufi, për shkak të egërsisë së krimit.
Ekzekutimit i 46-vjeçarit Bardhok Pllanaj duket se ka prishur ekuilibrat në botën e krimit në Shkodër pasi viktima njihej si person me precedentë të theksuar kriminalë ndërkohë që i kishte shpëtuar drejtësisë të paktën tri herë.
7 vite më parë, i dyshuar si trafikant narkotikësh, Pllanaj arriti t’i shpëtonte policisë dhe u fsheh në automjetin e ish-deputetit Mark Frroku. Ngjarje kjo e cila trazoi politikën katër vite më parë si një skandal i përmasave të mëdha, por që Frroku e mohoi një gjë të tillë. Nga ana tjetër, ishte raporti i oficerëve të gjurmimit në sektorin e narkotrafikut ku shkruhet se ai ka lëvizur nga lokal “Antika” në Tiranë drejt Laprakës me automjetin “Audi” në pronësi të deputetit. 46-vjeçari ishte në kërkim policor në 2014-ën i dyshuar për trafik droge.
I njohur ndryshe si “Kumbari” i Shkodrës, Pllaja mbahej në vëzhgim prej disa kohësh si i përfshirë në trafik droge për llogari të operacionit “Lugina Vilunit”, ku u sekuestruan rreth 804 kg drogë e lloji kanabis në momentin kur po tentohej të trafikohej drejt Italisë me gomone. Droga u hodh nga trafikantët në det në vendin e quajtur Rana e Hedhun në Shëngjin pasi ata panë shërbimet e policisë. Koka i trafikut u dyshua pikërishit biznesmeni Bardhok Pllanaj.
Gjatë operacionit “laguna e Vilunit të zhvilluar më datë 30 shtator 2014, në vendin e quajtur “Rana e Hedhun” midis Lagunës së Vilunit dhe Shëngjinit, shërbimet e policisë kufitare dhe ato të Guardia di Finanza, panë të hidheshin nga një mjet lundrues, në det çanta të zeza në përmasa të mëdha. Pasi u nxorën nga deti, rrezultoi se brenda thasëve kishte drogë me peshë 210 kg. Të nesërmen, në vendin e quajtur Grykëderdhja e Bunës në Velipojë, forcat e policisë kufitare gjetën të hedhura në det edhe 15 çanta të tjera me peshë 594 kg. Hetimet provuan se sasia e lëndës narkotike ishte ngarkuar në skaf në Velipojë për t’u dërguar në Itali, te pritësit e saj, njëri prej të cilëve është identifikuar si shtetas italian.
Ngjarja e sotme na zbulon se vrasja e Bardhok Pllanajt ka qënë fillimi i një serie ngjarjesh kriminale të cilat prishin qetësinë e qendrës së veriut të Shqipërisë.
