Kreu i grupit të PD, Enkelejd Alibeaj ka deklaruar se i vetmi deputet demokrat që i kërkoi të tërhiqte padinë në Gjykatë për Kuvendin e 11 dhjetorit, ishte Helidon Bushati. Ai shtoi se propozimi i Bushatit do të ishte i mundshëm kur platforma e bashkimit të zbatohet.
“Për të qenë korrekt, Helidon Bushati ka propozuar që të ndalohej procesi i zgjedhjeve në bazë, dhe të ishte dhe tërheqja e ankimimit në gjykatë, por që të ndodhë kjo duhet të gjendet një emërues i përbashkët. Procesi i bashkimit sipas këtyre parimeve, duke përfshirë të gjithë anëtarësinë, duke e zgjeruar anëtarësinë, është kjo vlera që bashkon demokratët, nëse kjo ndodh, gjithçka tjetër është e pavlerë”, tha Alibeaj.
Teksa u pyet nëse shihte ndonjë pengesë për implementimin e kësaj platforme, Alibeaj tha se këto zhvillime nuk e bashkojnë PD-në, përkundrazi. Madje, një ndër pikat kryesore të platformës ishte ndërprerja e riorganizimeve të njëanshme në parti për t’i dhënë një mundësi ribashkimit.
