Autoriteti Rrugor Shqiptar (ARRSH) ka njoftuar devijimin e rrugës nga Tirana në Elbasan dhe anasjelltas përgjatë një javë në datat 15 prill deri në 22 prill në fashën kohore 22:00-06:00 të mëngjesit.
Vendimi ka ardhur pasi punimet për ndërtimin e rrethrrotullimit në dalje të Tiranës për në Elbasan janë në përfundim. Sipas ARRSH-së, për shkak të këtij devijimi, automjetet që do të vijnë nga Elbasani do të lejohen që të kalojnë në rrugën pas “TEG” ndërsa ata që vijnë nga Unaza Lindore do të lejohen vetëm të kthehen djathtas në drejtim të Tiranës.
Ndërkohë, mjetet e vogla që do të vijnë nga Tirana do të kthehen në mbikalimin “Mjull Bathore”. Ndërkohë mjetet e rënda e të gjata, si trailera e maune, do të parkohen në segmentin “Mjull Bathore-TEG” (Unaza) dhe do të lejohen të kalojnë në rrethrrotullim gjatë një intervali kohe të caktuar, i cili do të caktohet nga punonjësit e orientimit të trafikut gjatë natës.
ARRSH-ja kërkon mirëkuptimin dhe bashkëpunimin e shoferave në lidhje me devijimin e qarkullimit të mjeteve sipas planit të menaxhimit bashkëlidhur dhe me intervalin kohor që do të bëhen këto devijime për shkak të punimeve.
