Autoriteti i Konkurrencës ka vendosur të anulojë gjobat e vendosura pak javë më parë për 3 kompani të plehrave kimike. Lajmin e ka bërë të ditur vetë kreu i Konkurrencës Denar Biba gjatë mbledhjes në Komisionin e Ekonomisë. Ai tha se vendimi i marrë nga ky institucion është ankimuar në gjykatë dhe këtë javë është vendosur pezullimi i gjobës. Kujtojmë se bëhet fjalë për 3 kompani të gjobitura me vlerën 1.5 milionë euro, për shkak se kishin deformuar konkurrencën, dhe kishin përcaktuar çmimet në treg
“Edhe gjobat e fundit fare që morën një lloj publiciteti, janë ankimuar në gjykatë dhe dje është vendosur nga Gjykata Administrative e Shkallës së parë është vendosur pezullimi i gjobave”, u shpreh Denar Biba.
Sa i takon 3 kompanive të plehrave kimike AGRO BLEND SHPK, MBM SHPK dhe CACA SHPK që u gjobitën muajin e kaluar hetimi për to kishte nisur që në mars të 2021 fillimisht ndaj 10 ndërmarrjeve me shumicë por vetëm këto tre kompani u gjetën në shkelje të importit dhe shitjes me shumicë të plehrave kimike dapit, Nitratit dhe Uresë. Konkretisht kompania AGRO BLEND SHPK u gjobit në shumën 118,978,015 Lekë, kompania MBM SHPK në shumën 66,088,573 Lekë dhe kompania CACA SHPK në shumën 7,087,994 Lekë. Kompanitë u ndëshkuan për shkak se kishin cenuar konkurrencën duke përcaktuar çmimet në treg.
Nga hetimet, rezultonte se 3 kompanitë e gjobitura kishin pozitë dominuese në tregun e plehrave kimike si DAP, Nitrat dhe Ure. Për këto produkte kompanitë kishin rritur njëkohësisht çmimet me shumicë, kishin operuar me çmime të përafërta duke përcaktuar në mënyrë të drejtpërdrejtë çmimet e shitjes dhe duke ndarë tregjet. Pavarësisht mbylljes së hetimit të thelluar të këtij tregu, monitorimi i tregut të importit dhe shitjes me shumicë të plehrave kimike DAP, Nitrat dhe Ure, do të vazhdojë edhe për një 1 vit.
