Drejtoria e Përgjithshme e Burgjeve njofton se janë lehtësuar masat e Covid në institucionet e vuajtjes së dënimit. Sipas njoftimit, janë rikthyer takimet për të dënuarit në burgje, 4 herë në muaj, jo për vetëm familjarët por edhe për të afërmit e tjerë.
Kujtojmë se një muaj më parë, Drejtoria e Përgjithshme e Burgjeve i ka propozuar Ministrit të Drejtësisë, Ulsi Manja lehtësimin e kufizimeve për parandalimin e përhapjes së pandemisë.
Disa ditë më parë, Komiteti Teknik i Ekspertëve ka prezantuar masat e reja për përballimin e pandemisë së Covid-19, ku u mor vendimi për heqjen e kufizimit për grumbullimet deri në 50 persona, ndërsa mbetet në fuqi maska në ambientet e mbyllura. Kujtojmë se masat anti-Covid janë lehtësuar thuajse në të gjithë botën, pasi numri i infektimeve ka rënë ndjeshëm.
