Anëtari i Komisionit të Rithemelimit të PD, Ivi Kaso ka reaguar pas një njoftimi të Gjykatës së Tiranës, lidhur me shqyrtimin e padisë së Enkelejd Alibeajt, për vendimin e datës 25 mars, që regjistroi statutin e Kuvendit të 11 dhjetorit. Në një postim në Facebook, Kaso sqaron se nuk është pranuar asnjë ankim ndaj vendimit që njeh Kuvendin e 11 dhjetorit. Sipas tij, kjo është një përpjekje përmes marifeteve proceduriale apo zvarritjeve, nga ata që refuzuan t’i shihnin firmat e delegateve të Kuvendit te Demokratëve.
“Për të gjithë ata që janë shqetësuar nga njoftimi i sotëm i Gjykatës së Tiranës, sqaroj se nuk është pranuar asnjë ankim ndaj vendimit që njeh Kuvendin dhe Statutin e 11 Dhjetorit! Njoftimi i sotëm i gjykatës vetëm SQARON se ky ende është në pritje të vendimit, në qoftë se ky është ankim sipas ligjit apo sipas qejfit të disave! NUK ËSHTË PRANUAR PËR SHQYRTIM ENDE ASNJË ANKIM. Praktikisht askush s’ka vendosur akoma nëse vendimi i 25 Marsit ka ankim apo jo. Përpjekja nëpërmjet marifeteve proceduriale apo zvarritjeve, nga ata që refuzuan t’i shihnin firmat e delegateve të Kuvendit te Demokratëve si në seli ashtu edhe në gjykatë, nuk mund të pengojë çertifikimin ligjor të vullnetit të tyre!” – shkruan Kaso.
Kujtojmë se pak më parë në një njoftim të shpërndarë për mediat, Gjykata e Tiranës ka dhënë detaje në lidhje me dy vendimet që janë dhënë sa i takon statutit të Partisë Demokratike. Në njoftimin e Gjykatës së Tiranës, thuhet se ka pasur dy procese, i pari ishte ai për njohjen e ndryshimeve statutore në Kuvendin e Korrikut të vitit të kaluar, dhe i dyti për njohjen e vendimeve të Kuvendit të datës 11 Dhjetor, thirrur nga ish-kryeministri Sali Berisha. Apelimi i bërë nga Alibeaj, për vendimin e datës 25 Mars, që njeh komisionin e rithemelimit si organ drejtues të PD-së do të shqyrtohet nga gjyqtarja Blerina Muça.
