Polumbarët dhe forcat RENEA kanë rinisur kërkimet për gjetjen e trupit të 10-vjeçarit, i cili u mbyt dy ditë më parë në lumin Fan të Mirditës. Kërkimet janë përqendruar në zonën e Repsit ku dyshohet të jetë dhe zona ku është mbytur i mituri.
Ditën e djeshme, polumbarët thanë se trupi i 10-vjeçarit dyshohet se ka ngecur në një urë të prishur disa kilometra larg vendit ku u mor nga rrjedha. Përveç urës, banorët dhe familjarët kërkojnë që të hapen portat e HEC në Reps, ndërsa kërkimet vazhdojnë. Në kërkime janë angazhuar 14 polumbarë, por ende nuk e kanë gjetur kufomën.
Familjarët kanë ngritur akuza në drejtim të policisë duke thënë se nëse do të kishin ndërhyrë në kohë, mbase trupi i 10-vjeçarit do të ishte gjendur më herët. Ata kanë deklaruar se njoftuan uniformat blu rreth orës 17:00, por pavarësisht kësaj, policia dhe polumbarët nuk kanë shkuar në vendin e ngjarjes.
I mituri ka qenë duke luajtur me fëmijët e tjerë dhe të vëllain, ku ky i fundit kishte tentuar ta shpëtonte nga rryma, por nuk ia doli dhe është kthyer në shtëpi ku ka njoftuar familjarët, të cilët presin me dëshpërim gjetjen e trupit të fëmijës.
