Agjencia e Blerjeve të Përqendruara ka njoftuar anulimin e procedurës për blerjen e artikujve ushqimorë për Rezervat e Shtetit me argumentin se nuk është paraqitur asnjë ofertë e përshtatshme.
Agjencia kishte si qëllim blerjen e 8 artikujve ushqimorë me një fond prej 33.3 milionë lekësh pa TVSH. Në listën e produkteve janë 16 500 kg makarona, 25 800 oriz, 22 500 sheqer, 16 mijë litër vaj luledielli, 26 mijë kg fasule e bardhë, 200 mijë kg miell gruri dhe nga 2 mijë kg konserva viçi dhe kripë.
Për secilin nga këto produkte janë përcaktuar forma, përbërësit dhe treguesit fiziko-kimik që ato duhet të përmbajnë, ambalazhimi si dhe ruajtja dhe transportimi i tyre.
Nëse marrim rastin e miellit kërkohet që niveli maksimal i përmbajtjes së lagështisë të jetë 15%, përqindja e aciditetit jo më shumë se 0.115, gluten jo më pak se 25% dhe elementë të tjera specifike në lidhje me përbërjen.
