Ngjarja e ndodhur ditën e djeshme në Mirditë, ka tronditur vendin. Heshtja ka pushtuar shkollën 9-vjeçare “Ndrec Ndue Gjoka”, ku mësonte 10-vjeçari që u mbyt në lumin Fan. Ngjarja tragjike ka tronditur nxënës dhe mësues në këtë shkollë. 10-vjeçari, i cili duhet të ishte sot në klasë, iu mungon shokëve të tij.
Gjendja e tyre psikologjike është mjaft e rënduar, ndërsa në këtë shkollë mësojnë dhe vëllai dhe motra e të miturit që është mbytur në lum.
Drejtori i shkollë, Frrok Lleshi shprehet i shokuar për ngjarjen. “Jemi tepër të hidhëruar. Ai ka qenë një fëmijë tepër i mirë, por situata e solli. Shkolla e përjeton shumë keq. Jemi të shokuar. Presim që ti gjendet trupi dhe ti bëjmë nderimet e fundit. Situata në shkollë është shumë keq. Kemi bërë orë edukative, psikologia është këtu, bashkë me stafin pedagogjik”, tha ai.
Ndërkaq kërkimet për gjetjen e trupit të së miturit kanë rinisur sërish mëngjesin e sotëm, ku forca të shumta policie dhe ambulanca ndodhen në vendngjarje.
