Ministrja e Financave Delina Ibrahimaj ka dalë sot në një konferencë për mediat ku ka folur për situatën e ekonomike në vend dhe ka treguar se cilat janë produktet që po mban nën monitorim Bordi i Transparencës që të mos rriten pa kontroll.
Mielli, orizi, sheqeri dhe vaji i lulediellit po mbikëqyren nga Bordi, dhe pritet të merret një vendim për çmimet e këtyre 4 produkteve që të mos shiten me çmim më të lartë nga ai që vendos Bordi.
“Do përcaktojmë formulën për përcaktimin e çmimeve. Bordi i Ushqimeve ka vendosur që më 1 prill të mbajë nën monitorim 4 produkte. Pra mielli, orizi kokërrgjatë, sheqeri dhe vaji i lulediellit. Do përcaktohet marzhi i fitimit dhe do aplikohet. Do dalim sot me disa çmime referencë. Nuk do të jetë me çmim më të lartë nga ai që vendos Bordi, do publikohen sot çmimet” tha Ibrahimaj.
Ndërkohë sipas ministres inflacioni me rritjen e çmimit të produkteve do të zgjasë më shumë se harku kohor i një viti, ndaj sipas saj u ngritën edhe bordet.
