Lëvizjet dhe ndalesat e bëra nga 37-vjeçari Iljaz Çali para se të vritej janë në duart e grupit hetimor. Kjo për faktin se ‘Land Rover’-i që kishte marrë me qira Çali kishte GPS dhe çdo lëvizje monitorohet nga kompania që e ka në pronësi. Biznesmeni i kromit kishte debatuar me dikë vetëm pak çaste para se të ndodhte atentati dhe këtë gjë e ka rrëfyer i vëllai, me të cili ka konsumuar kafe rreth orës 22:00.
“Kemi qenë duke pirë kafe me të deri në orën 22:00 dhe më pas Iljazi është nisur për në shtëpi. Gjatë kohës që pinim kafe, ai ka debatuar vazhdimisht ne telefon me një person”- ka thënë ai.
I vëllai tregoi dhe dy personat me të cilët kanë pasur probleme, një me inicialet RR.D., që u kishte 1 milionë dollar borxh dhe një tjetër me inicialet I.C., me të cilin kanë debatuar për biznesin e kromit. Kamerat e sigurisë do të zbulojnë më shumë detaje, ndërsa provat janë në duart e grupit hetimor.
