Kryetari i Komanduar i Partisë Demokratike, Enkelejd Alibeaj, atakoi vendimin e kryetares së Kuvendit Lindita Nikolla për të anuluar mbledhjen e Këshillit të Mandateve për të diskutuar heqjen e deputetit Alqi Bllako, pas dorëheqjes së këtij të fundit. Përmes një konference për mediat, Alibeaj tha se është e çuditshme, e padëgjuar, në shkelje të kushtetutës dhe në shkelje të kompetencave anulimi i mbledhjes së Këshillit të Mandateve.
“Prokuroria ka paraqitur këtë kërkesë për dhënien e autorizimit për heqjen e mandatit të deputetit Alqi Bllako. Pas kësaj kërkese ka pasur nga kryetarja e Kuvendit një urdhër për mbledhjen e Këshillit të Mandatave dhe deputeteve, ditën e sotme ore 18:00. Ende nuk ka shkuar ora 18:00, por në adresën tonë elektronike jo më shumë se 20 minuta më parë vjen një mesazh nga kryetarja e Kuvendit në mënyrën më antiligjore, ku është vendosur anulimi i mbledhjes së mandateve. E çuditshme, e padëgjuar, në shkelje të kushtetutës dhe në shkelje të kompetencave të Këshillit të Mandateve. Pasi kryetarja e Kuvendit thërret Këshillin e Mandateve është ai që vendos dhënien e autorizimit ose jo është vetë Këshilli” – tha Alibeaj.
