Deputeti i Partisë Demokratike Ervin Salianji ka denoncuar Kuvendin, se nuk iu ka vënë ende në dispozicion anëtarëve të Këshillit për Rregulloren, Mandatet dhe Imunitetin, kërkesën e SPAK për t’i hequr mandatin deputetit socialist Alqi Bllako.
Salianji shkruan në Facebook se edhe pse deputetët i ndajnë vetëm 4 orë nga mbledhja, Kuvendi vijon të mbajë të fshehta dokumentet zyrtare të SPAK, ndërsa shton se qeveria po bën një shkelje tjetër të ligjit.
“Dje, rreth orës 18:35, në postën elektronike të anëtarëve të Këshillit për Rregulloren, Mandatet dhe Imunitetin ka mbërritur një email nga sekretaria e Kuvendit, ku njoftohen për mbledhjen e ditës së nesërme në orën 18:00 për shqyrtimin e kërkesës së SPAK. Në email thuhet se dokumentacioni shoqërues i kërkesës është gati dhe mund të tërhiqet pranë sekretarisë ditën e nesërme. Por, e vërteta është se as ditën e nesërme në mëngjes dhe deri më tani, kur na ndajnë më pak se katër orë nga fillimi i mbledhjes së Këshillit, materialet nuk na janë vënë në dispozicion. Askush nuk e di se cila është arsyeja apo arsyet që Kuvendi i Shqipërisë iu mban të fshehur anëtarëve të Këshillit, dokumentacionin e dërguar me SPAK. Por, ajo që ne dimë me siguri është se sot pushteti dhe veglat e tij janë në hall, dhe mbi të gjitha se ajo që po bëjnë është një tjetër shkelje flagrante e ligjit. Halli i qeverisë nuk janë zyrtarucët që i ka përdorur dhe më pas i ka lëshuar, halli i tyre është koka e grupit”, shkruan Salianji.
Mbledhje e Këshillit për Rregulloren, Mandatet dhe Imunitetin pritet të mbahet sot në orën 16:00, por duke qenë se Alqi Bllako paralajmëroi se do të dorëzojë mandatin duke u përballur me SPAK si qytetar i thjeshtë, ndoshta mbledhja mund të anulohet.
