Ndonëse të gjithë prisnin që Lulzim Basha të nisej drejt Hollandës pas dorëheqjes nga posti i kryetarit të Partisë Demokratike, ai ka zgjedhur të qëndrojë në Tiranë. Një javë pas dorëheqjes, Basha ka nisur takimet me bazën e anëtarësisë, të cilët e kanë mbështetur në këto kohë të vështira për karrierën e tij politike.
Nën zë flitet që ish-kreu i PD është në hapat e para e krijimit të një partie të re, ku pritet të grumbullojë pas vetes njerëzit e tij më të afërt Gazmentin Bardhin, Ekelejd Alibejn dhe figura të tjera që kanë dalë publikisht kundër rikthimit të Berishës në krye të PD.
Gjatë ditës së djeshme në media u raportua se Basha ka marrë edhe zyra të reja, në afërsi të selisë së PD-së, në qendrën Torre Drin, ku pritet të koordinojë dhe aksionin e tij të radhës politik.
Pas dorëheqjes nga PD, ai nuk e mohoi kategorikisht rikandidimin, ndërsa së fundmi ai ka nisur takimet me bazën, të cilët ndryshe nga sa bënte kur ishte kryetar, po i zhvillon pa prezencën e mediave.
Megjithëse ish-kreu i selisë blu nuk ka bërë asnjë dalje publike pas dorëheqjes, rikthimi i Berishës në PD dhe kandidimi për kryetar, do t’ia bëjnë të vështirë Bashës rrugën drejt Kryeministrisë, prandaj partia e re duket se është zgjidhja e vetme për të.
