Shefi i Policisë së qytetit të Teksasit, David Brown, ka deklaruar se personi që vrau pesë oficerë policie në Dallas dhe plagosi 7 të tjerë, po planifikonte një sulm edhe më të madh.
25 vjeçari Micah Johnson, gjatë përballjes me policinë u tha negociatorëve se ishte zemëruar për vrasjet e njerëzve me ngjyrë nga policia dhe se qëllimi i tij ishte të vriste oficerë të bardhë. Në një deklaratë për mediat, shefi i policisë tha se hetimet kanë treguar që Johnson kishte bërë praktikë me eksplozivë. Ai gjithashtu shtoi se hetuesit po përpiqen që të gjejnë kuptimin e inicialeve RB, të cilat vrasësi i shkroi me gjakun e tij pranë vendit ku u vra nga një bombë e policisë.
Ditari i gjetur në shtëpinë e Johnson është një tjëtër element që policia po përpiqet të deshifrojë për më shumë të dhëna.
Micah Johnson sulmoi në befasi forcat e rendit gjatë një proteste në Dallas kundër vrasjes së njerëzve me ngjyrë nga policia. Për të zënë në kurth oficerët e policisë, ai shfrytëzoi përgatitjen e tij ushtarake të fituar gjatë misionit si ushtar në Afganistan.
