Kreu i grupit parlamentar të PS, Taulant Balla ka dhënë një deklaratë për mediat ku ndër të tjera ka folur dhe për zgjedhjen e Presidentit të ri të Republikës pas përfundimit të mandatit të Ilir Metës më 24 korrik.
Balla tha para gazetarëve se procedura për zgjedhjen e Presidentit fillon jo më vonë se 24 maji, ndërsa shtoi se mund të kemi një Presidente në krye të Republikës.
“Me të mbaruar seanca nesër do të jemi në terren për takuar qytetarët. Presidenti? Procedura fillon jo më vonë se 24 maj, në këtë kuptim Kuvendi ka ende kohë derisa të fillojë procedurat. Kjo procedurë merr 5 raunde votimi. Këtij procesi do të duhet t’i lihet koha e nevojshme. Atëherë do të kemi presidentin, apo presidenten e radhës. Duroni dhe pak ditë”, tha Balla.
Ndër të tjera, Balla tha se pas mbledhjes së sotme të grupit të PS-së, u vendos që pas ministrave, edhe deputetët do të dalin në terren për të inspektuar çmimet e ushqimeve.
