Kryeministri Edi Rama ka ndërmarrë vendimin “ekstrem” për të mos bërë asnjë replikë në rrjetet sociale, duke reaguar i indinjuar se nuk do të kthejë më komentet në Facebook.
Në një shkrim të gjatë, Rama bën me dije se ka zgjedhur të replikojë vazhdimisht me ndjekësit e tij, por sipas tij kjo formë komunikimi i është përkthyer si arrogancë, prandaj ka hequr dorë.
“Po mbase jam unë gabim, përderisa disa këtu e shohin këtë përfshirje timen të drejtëpërdrejtë nëpër komente, si arrogancë, si karshillëk, si tallje e ku di unë çfarë tjetër. Për mua është krejt e kundërta, sepse një kryetar qeverie që nuk pyet për popullin, nuk respekton njerëzit apo aq më keq, tallet me opinionet e tyre, as nuk e merr kurrë mundimin të japë e të marrë me ta si i barabartë, siç bëj unë këtu prej kaq kohësh. Po ja që kjo përpjekje e imja ndeshet në një keqkuptim të madh nga ata që duan ta thonë atë që mendojnë, po nuk duan ta dëgjojnë të kundërtën nga unë, siç e dëgjoj unë prej tyre”, shkruan Rama.
Ndoshta i gjendur në presion nga komentuesit të cilët nuk kanë hezituar asnjëherë t’i shprehin kritikat e tyre, Rama vendosi të bëjë një hap pas, ndonëse shkruan se përpiqet të kuptojë stresin e shkaktuar nga lufta në Ukrainë
“Sot është mëse normale që të jemi të gjithë nën stresin e shtuar prej goditjes së luftës në Ukrainë mbi çmimet! Por është anormale ta mohojmë këtë fakt duke i kërkuar shkaqet e kësaj rritjeje kudo ku ato nuk janë. Po mbase jam unë krejt gabim që këmbëngul fort për të bindur me replika edhe ata që nuk duan të binden. Prandaj, shkurt fjala, duke u kërkuar ndjesë të tërë atyre që e kanë keqkuptuar ndërhyrjen time nëpër komente si mungesë respekti, ju informoj të gjithëve se nuk do të ndërhyj më. Që nga dita e parë në këtë detyrë kam bërë më të mirën time dhe do të vazhdoj ta bëj deri ditën e fundit në këtë detyrë”, shprehet ndër të tjera ai.
