Kreu i Partisë Demokratike Lulzim Basha ka reaguar pasi kryeministri Edi Rama ka prezantuar Paketën e Rezistencës Sociale duke thënë se po tallet me qytetarët duke thelluan krizën.
Sipas Bashës, kryeministri po përdor të njëjtën skemë si në kohën e pandemisë, ku ka parashikuar lëmoshë për një pjesë të vogël duke zhytur qindra familje të tjera në varfëri.
“Edi Rama vazhdon të tallet me qytetarët me gjoja paketa shpëtimi. Është e njëjta skemë siç bëri në kohën e pandemisë, ku shumica dërmuese e shqiptarëve u zhyten në mjerim. Qeveria ka parashikuar të shpërndajë lëmoshë tek grupe të kufizuara, që po mbijetojnë, kur në fakt rritja e çmimeve prek të gjitha shtresat dhe do të zhysë në varfëri qindra mijëra familje. Ia kemi propozuar kohë më parë ku i kërkuam të marrë masa. Sepse shqiptarët janë aq të varfër sa nuk i përballojnë dot kostot shtesë për të përmbushur nevojat bazë”, shkruan Basha.
Kreu demokrat bëri një krahasim me Maqedoninë e Veriut ku Kuvendi ka miratuar ligjin për uljen e akcizës për karburantet si dhe ka vendosur uljen e TVSH-së për ushqime bazë, ndërsa në Shqipëri Rama e ka bërë të qartë që nuk do të ketë ulje taksash.
