Ish-kryeministri Sali Berisha ka vizituar qytetin e Elbasanit, në kuadër të festimeve të Ditës së Verës, ku ndër të tjera u pyet nga gazetarët dhe për zhvillimet në Partinë Demokratike.
I pyetur nëse ishte gati që të sakrifikohet për PD-në, duke hequr dorë nga rikandimi për kreun e kësaj force politike, Berisha u përgjigj duke thënë se thënë se ata që e kërkojnë këtë janë duke luajtur blofin.
“Uroj qytetarët e Elbasanit, të cilët e mbajtën gjallë më shumë se të gjithë të tjerët këtë festë të mrekullueshme, ndaj Elbasani konsiderohet kryeqyteti i festës, kryeqyteti i vendit. Festa e Ditës së Verës është dita e lulëzimit, e shpërthimit të burimeve, e çeljes së gjithçkaje të mirë. Uroj që për shqiptarët kjo ditë të sjell ndërrimin e narkoshtetit, dhe rivendosjen e shtetit ligjor. Një urim kam për ata qindra mijëra shqiptarë që kanë mbushur rrugët dhe sheshet e vendit, për të protestuar kundër një politike cinike dhe të pashpirt, që përdor si pretekst hijet e luftës në Ukrainë, për të justifikuar rritjen e çmimeve më jetike të qytetarëve shqiptarë. Edhe njëherë gëzuar këtë ditë për mbarë shqiptarët. Kjo do të jetë pranverë, mesazhi më i shkëlqyer është bashkimi i demokratëve rreth votës së lirë. Nuk po mbroj asgjë tjetër veç votës së lirë, ka një përpjekje për të stisur një përballje mes votës së lirë dhe blofit, por atyre do t’iu lëmë blofin në dorë”, tha Berisha.
