Denoncimet apo skandalet e ndryshme në media, nuk i kanë penguar qytetarët që të votojnë familjarisht duke thyer rregullat e votimeve. Pas Vorës, një tjetër rast i votimit në grup është identifikuar në Lushnje, ku një prej qytetarëve ka votuar edhe për mamanë e tij, me pretekstin se po e ndihmonte të kryente veprimet e duhura.
Gjatë këtij momenti, komisionerët nuk kanë reaguar, por rasti është filmuar nga kamerat e Fax News. Në momentin që njëra prej komisionerëve është pyetur nëse kjo gjë ishte e lejueshme, ajo është përgjigjur se fleta e votimit do të shënohej e pavlefshme në procesverbal dhe se do votohej sërish.
Qytetari: Ore zotëri, me mua u fut plaka ore, ti je në transmetim të drejtpërdrejtë, por unë kam mbajtur procesverbal se po ndihmoja mamanë.
Një prej komisionereve: Ne e kemi mbajtur në proceverbal që zotëria po shoqëronte zonjën që është mamaja e tij, në mënyrë që të votonte.
Gazetarët: A mund të votojë djali në vend të nënës?
Komisionerja: Mesa di unë, jo!
Gazetarët: Atëherë si u lejua që të ndodhte kjo gjë?
Komisionerja: Ai shoqëroi nënën e tij.
Gazetarët: Ai votoi në vend të nënës së tij.
Më herët, Partia Demokratike denoncoi se në Vorë po votohej familjarisht, duke rënë ndesh me çdo kod zgjedhor që përcakton se vota është e fshehtë dhe askush të mos ketë dijeni.
