Bashkia Shkodër me në krye drejtuesen Voltana Ademi ka zhvilluar një tjetër tender ku janë skualifikuar të gjithë konkurrentët përveç fituesit. Në procedurën e hapur në datën 5 janar 2022, bashkia parashikon sistemim, asfaltim, rruge te brendshme Dobraç ku përfshihet rruga Çeliku, Dinaj, Haxhi Zeneli.
Ky tender mban numrin e referencës REF-16843-12-31-2021 dhe ka fondin limit prej 13 323 678 lekëve të reje, ose rreth 130 milionë lekë të vjetra.
Në këtë tender kanë marrë pjesë 5 kompani, “S.M.O.UNION” sh.p.k, ”Grama”sh.p.k, “VARAKU E” sh.p.k, “Lacaj”sh.p.k, “Delia Impex” sh.p.k
Sipas dokumentit të siguruar nga 27.al vërtetohet se 4 kompani prej tyre, janë skualifikuar dhe fituese është shpallur automatikisht kompania LACAJ SHPK, me ofertën prej 12 603 956 lekë të reja ose rreth 130 milionë lekë të vjetra. Arsyet e skualifikimit pa të drejtë të firmave konkurruese janë pothuajse të pajustifikueshme ose lehtësisht të manipulueshme për të shpallur fituese kompaninë e priviliegjuar. Rreth 130 milion lekë janë zbrazur nga buxheti i shtetit të cilat tashmë dukshëm do të përfitohen nga Bashkia përmes firmës fituese.
Edhe ky prokurim është shoqëruar nga “Open Data” me flamurin e kuq duke ngritur shqetësimin për skualifikimin e të gjithë kompanive përveç fituesit. Këto procedura diskriminuese dhe në kundërshtim me ligjin, janë kthyer në një “zakon” që po vë me “shpatulla pas murit” gjithë qytetarët taksat e të cilëve po shpërdorohen nga bashkitë.
Sakaq ende nuk ka ndonjë hetim apo verifikim të nisur as nga KLSH as nga Autoriteti i Konkurrencës për procedurat e paprecedenta që bëhen për të fituar sa më shumë para.
