Komisioni i Ankimimeve dhe Sanksioneve (KAS), mblidhet sot me kërkesë të Partisë Demokratike për të zhbërë koalicionin ‘Shtëpia e Lirisë’ për zgjedhjet e pjesshme lokale në 6 bashkitë e vendit.
Në mbledhjen e parashikuar në orën 08:30 relatori i kërkesës ankimuese i zgjedhur nga KQZ është Ledio Braho, ndërsa vendimi pritet të jepet në orët e pasdites.
PD parashtron 3 argumente në kërkesën e saj, dorëzimi i kërkesës për koalicion nga LSI para se të regjistroheshin si parti, u përdorën simbolet e PD pa miratimin e kryedemokratit si dhe mbetet ende e paqartë se cila parti do të propozojë kandidatët për 6 bashkitë në zgjedhjet e 6 marsit.
Ndërkohë ankimimi i PD-së është bërë dhe pas vendimit të KQZ-së për të përjashtuar nga koalicioni me LSI-në dhe PDK-në regjistrimin e Sali Berishës. Sipas PD marrëveshjes i mungon edhe një element tjetër i rëndësishëm që ka të bëjë me përcaktimin e numrit të kandidatëve nga secila parti politike.
Ndërkohë kujtojmë se Komisioni Qendror i Zgjedhjeve vendosi regjistrimin e koalicionit “Shtëpia e Lirisë” për të garuar në zgjedhjet e pjesshme lokale që pritet të mbahen më 6 mars, por pa grupin e ish-kryeministrin Sali Berisha.
Kreu i KQZ tha se në garë për 6 marsin me këtë koalicion mund të futen vetëm dy parti, Lëvizja Socialiste për Integrim e kryesuar nga Monika Kryemadhi dhe Partia Demokristiane me kryetar Nard Ndokën.
