Sekretari i Përgjithshëm i PD Gazment Bardhi i është përgjigjur LSI pasi kjo e fundit tha se nuk e njeh Lulzim Bashën si kreun e PD, ndërsa duke përdorur gjuhën e Berishës e cilësoi si “deputeti Basha”.
Gjithashtu, numri dy i PD ka komentuar edhe koalicionin Berisha-LSI për zgjedhjet lokale të 6 marsit, që do të quhet “Shtëpia e Lirisë”, duke e ironizuar si “Shtëpia non grata”.
“Izolimi i Sali Berishës nuk do të sjellë kurrë izolimin e PD dhe tentativa për të shpallur Non Grata logon e PD ka dështuar në 18 Dhjetor. Për demokratët dhe çdo shqiptar që do ndryshimin nuk ka logo tjetër që i përfaqëson përveç asaj të PD. Sot Sali Berisha pohoi me gojën e tij se po i bën mbështetësit e tij shtojcë të LSI. Nuk ka Shtëpi të Lirisë. Ka Shtojcë të LSI-së në shtëpinë e tyre të përbashkët NON GRATA!. Regjistrimi në zgjedhje ka vulën e LSI-së, komisionerët kanë vulën e LSI-së. “Shtëpia Non-Grata” i shërben Edi Ramës, siç ka bërë që në 2013, me aleancën e dukshme dhe të padukshme mes tyre! Në 6 Mars, kush zgjedh “Shtëpinë Non-Grata” ka zgjedhur Edi Ramën”, shkruan Bardhi.
LSI tha më herët se Basha ishte i tmerruar nga “primaret” e organizuara ditën e djeshme nga Berisha, ndërsa akuzojnë kreu demokrat se po i provokon për të shmangur vëmendjen.
