Ish-kryeministri Sali Berisha ka prezantuar kandidatët e dalë nga primaret e organizuara nga vetë ai, për zgjedhjet e pjesshme lokale në 6 bashki të vendit. Berisha tha se dita e djeshme shënoi aplikimin e një standardi që nuk ka ekzistuar më parë në Shqipëri duke e konsideruar si ditë historike.
Ish-kryeministri u shpreh për mediat se primaret e djeshme nuk janë të parat, por të parat ku çdo kandidat është produkt i anëtarësisë së bazës.
“Së pari dëshiroj të falenderoj nga zemra ata mijëra anëtarë të PD që me votën e tyre të lirë bënë historinë. Ata sollën sot këtu para jush për herë të parë në historinë e pluralizmit politik në Shqipëri kandidatë të cilët janë propozuar votëbesuar përzgjedhur tërësisht nga anëtarësia e PD. Këto nuk janë primaret e para. Primaret e para në historinë e PD janë zhvilluar në vitin 2000 me qeveritarë vendorë. Por këto janë primaret e para ku çdo kandidat është kontribut i anëtarësisë së bazës. Asnjë nga këto nuk është kandidat i Berishës apo komisionit të rithemelimit. Janë që të gjithë të propozuarit e bazës së partisë që ka Kjo i bën këto primare më demokratiket të zhvilluara në ndonjë vend dhe mund tu them se dita e djeshme shënoi aplikimin e një standardi të paparë që s’ka ekzistuar ndonjëherë në Shqipëri”.
Berisha tha se dita e djeshme shënon shkëputjen nga praktikat jo transparente dhe të dyshimta, pasi sipas tij gara ishte transparente dhe kandidatët u zgjodhën nga anëtarësia.
