Deputetja demokrate Oriola Pampuri, ka komentuar deklaratën e deputetit socialist Rrahman Rraja, i cili u shpreh se gjendja e pacientëve është e mirë, ndërkohë ka shtuar që qytetarët ta blejnë ujin e pijshëm.
Pampuri është shprehur se Rrajën se ka dëgjuar asnjëherë që të ngrejë problemet e qytetarëve të Krujës, teksa ka shtuar se nuk mund të thuhet e kundërta e realitetit.
“Jam njohur nga afër me hallet dhe problemet e qytetarëve të Krujës dhe edhe gjatë kohës që nuk kemi qenë në Kuvend dhe tani nuk e kam dëgjuar Rrajën të ngrejë një problem. Nuk është çështja që ne në media të shfaqim një realitet që nuk ka lidhje me të vërtetën sepse dëmtojmë dhe veten. S’duhet të themi të kundërtën e realitetit. Spitali Krujës është në gjendje të rëndë. Akoma janë të çarat e tërmetit. Një deputet i cili nuk ka ngritur njëherë problematikat e atij qyteti, nuk mund të dalë të thotë sot të presim analizat e ujit, sepse qytetarët e kanë thënë vetë se janë helmuar nga uji. Përgjegjësia duhet të jetë e shtetit”, tha Pampuri për Ora News.
