Redi Balla 22-vjeç u gjet nga policia i plagosur në këmbë me armë zjarri, mbrëmjen e djeshme te zona e Komunës së Parisit në Tiranë, por nuk pranoi që të jepte shumë detaje në lidhje me rrethanat. Lidhur me ngjarjen raportohet se i riu nuk ka dhënë dëshmi të plotë.
Ai është shprehur se “nuk e pashë kush më qëlloi”. “Isha në kafe, do të shkoja në shtëpi. Kisha parkuar aty, sa vajta te makina më qëlluan në këmbë, nuk jam banor i asaj zone” ka thënë më tej ai.
Por një gjë e tillë nuk e ka bindur grupin hetimor që pritet që ta marrin sërish në pyetje të plagosurin që ndodhet në spitalin e Traumës në Tiranë. I plagosuri është jashtë rrezikut për jetën. 22-vjeçari është i skeduar si tip problematik, pasi ka qenë më parë disa herë i shoqëruar për konflikte që kanë përfunduar në dhunë.
Policia ka marrë edhe dëshmitë e disa prej banorëve të zonës, por edhe pamjet nga disa kamera sigurie për të shkuar në gjurmët e autorit.
