Gjashtë parti opozitare turke janë bërë bashkë për të rrëzuar presidentin e vendit, Rexhep Taip Erdogan.
Sipas mediave, partitë do të rrisin bashkëpunimin për të mundur Erdogan dhe partinë e tij, “AKP” në zgjedhjet e vitit 2023. Qëllimi i tyre është i njëjtë, por duket se kanë më shumë shanse tani që sondazhet tregojnë se AKP është rreth 31-33% të votave, nga 42.6% që kishte fituar në zgjedhjet parlamentare 2018.
Palët mbajtën një takim të tretë të martën, sipas Reuters, dhe po planifikojnë takime javore për të rënë dakord mbi parimet e përbashkëta deri në fund të vitit.
Reuters citoi zyrtarë të përfshirë në bisedime dhe analistë politikë të cilët u shprehën se opozita në Turqi po bën një përpjekje që nuk është bërë kurrë më parë: të bashkohet për t’u përballur me qeverinë.
Mbështetja për qeverinë e Erdoganit po zvogëlohet mes kritikave për mënyrën se si po trajton problemet financiare të tilla si inflacioni i lartë dhe papunësia, pandemia Covid-19 por edhe zjarret e përmbytjet.
